Revista PERPJEKJA

Ndodheni këtu: Faqja kryesore
E Mërkurë, 27 Tet 2021
E Dielë, 09 Tetor 2011 19:18

Islami, demokracia dhe perëndimi

Trembëdhjetë vjet pasi Revolucioni Iranian solli në pushtet të parën teokraci moderne në historinë botërore, Islami po shpërfaqet rishtazi si një idiomë politike e fuqishme. Jo vetëm në Lindjen e Mesme, por që nga Afrika Veriore e Perëndimore

dhe deri në republikat aziatike të ish-Bashkimit Sovjetik, nga India në Kinën Perëndimore, Islami po spikat gjithnjë e më fort si një forcë e përvijuar qartazi në skakierat e politikës së ditës. Vala e re e lëvizjes ka rrokur përmasa të tilla saqë, me shembjen e komunizmit, në mënyrë gjithnjë e më të theksuar -por edhe të gabuar-, Islami po cilësohet si njëri nga rivalët e ardhshëm ideologjikë të Perëndimit. Faza më e fundit zuri fill në fund të viteve 1980. Ajo ndryshon në mënyrë mëse të qartë nga përvoja Islamike e Iranit më 1979-n, e Libanit pas 1982-shit dhe e një numri të konsiderueshëm grupesh të vegjël në Egjipt, Arabi Saudite, Kuvait, Siri dhe gjetkë, përgjatë fundit të viteve 1970 dhe fillimit të viteve 1980. Dy nga veçoritë më të spikatuara të islamistëve të rinj janë elektorati dhe taktikat.