Revista PERPJEKJA

You are here: Faqja kryesore
Sunday, 16 May 2021
Friday, 21 October 2011 08:42

Bota që vrapon: Përsëritje e leksioneve Reith

Në këtë leksion propozoj të zgjerohem dhe të hedh një vështrim tek temat që diskutova në leksionet Reith të BBC-së në prill të këtij viti. Tema e leksioneve Reith, po ashtu si tema e leksioneve të tanishme, ishte

globalizimi dhe ndryshimet e pabesueshme që po ndodhin në botën ku jetojmë. Pikënisja e këtyre leksioneve është ajo çka unë përcaktoj si bota që na ka zënë në befasi. Më duket se bota ku jetojmë, bota e fundit të shekullit të njëzetë, nuk duket si bota që ëndërronin themeluesit e Iluminizmit. Këta qenë themeluesit kryesorë të traditave intelektuale të cilat krijuan kulturën perëndimore, dhe që gjithmonë e më tepër i dhanë trajtë kulturës globale. Ata kishin një parim tepër të thjeshtë, por edhe tepër të fuqishëm, rreth marrëdhënies midis diturisë njerëzore, shkencës, teknikës dhe botës së jashtme. Mendimi i tyre qe se sa më shumë të mund ta kuptojmë botën e natyrës, jetët tona dhe historinë tonë, aq më shumë kemi mundësi të kontrollojmë natyrën dhe të drejtojmë historinë. Mendoj se kjo është një ide e thjeshtë dhe bindëse.