Dihet mirë se ardhja në fuqi e Hitlerit në vitin 1933 shënoi për ebrejtë e Gjermanisë fillimin e një periudhe të vështirë diskriminimi, persekutimi dhe më në fund genocidi. Në këto kushte bëhej e qartë se për ta nuk kishte rrugë tjetër shpëtimi veçse ikja në vende të tjera më të sigurta. Emigrimi i një mase aq të madhe njerëzish shtronte përpara dy probleme kryesore: i pari kishte të bënte me zgjedhjen e një vendi të përshtatshëm, ku mund të stabilizoheshin këta refugjatë dhe, i dyti, me mënyrën se si do të shpërnguleshin ata. Përsa i përket të parit, ishte menduar që emigrantët e shpërngulur nga Gjermania të shkonin në Palestinë. U zgjodh Palestina, sepse pikërisht aty ishte parashikuar të krijohej shteti i ardhshëm çifut. Problemi i dytë ishte më i vështirë. Si do të realizohej kjo shpërngulje masive drejt Lindjes së Mesme?
